ကြက်သွန်ဖြူရဲ့ သိပ္ပံနည်းကျ တွေ့ရှိချက်များ

ကြက်သွန်ဖြူရဲ့ သိပ္ပံနည်းကျ တွေ့ရှိချက်များ

ကြက်သွန်ဖြူဆိုတာ ကမ္ဘာမှာအသုံးအများဆုံး ဟင်းခတ်အမွှေးအကြိုင်တွေထဲက တခု ဖြစ်ပါတယ်။ ကြက်သွန်ဖြူ(Garlic)ဟာ ကြက်သွန်နီအမျိုးအစားAlliumထဲမှာ ပါဝင်တယ်။allium မျိုးနွယ်ဝင်ဖြစ်လို့ အနံ့က စူးရှပြီး စပ်ဖျဉ်းဖျဉ်းအရသာရှိပေမယ့် ဟင်းထဲထည့်ချက်ရင် ချိုတဲ့အရသာ ဖြစ်စေတယ်။ ကြက်သွန်ဖြူကို နိုင်ငံတိုင်းနီးပါးမှာ အသုံးပြုကြပါတယ်။ ဒီထဲမှာ တရုတ်နိုင်ငံက ထုတ်လုပ်မှုအများဆုံးဖြစ်ပြီး တကမ္ဘာလုံးတင်သွင်းမှုရဲ့ ၄ပုံ၃ပုံထိ ရှိတယ်။ တကယ်တော့ ကြက်သွန်ဖြူကို အသုံးပြုခဲ့တာ ကြာပါပြီ။လွန်ခဲ့တဲ့ နှစ်ပေါင်း၇၀၀၀ကျော်ကတည်းက အာရှအလယ်ပိုင်းဒေသတွေမှာ စတင်သုံးစွဲခဲ့တယ်လို့ ယူဆကြတယ်။ အမှန်တော့ ဒီထက်ကို စောနိုင်ပါသေးတယ်။ ဂီဇာအရပ် ပိရမစ်တွေဆောက်တဲ့ခေတ်က ကြက်သွန်ဖြူ သုံးစွဲနေတဲ့အထောက်အထားတွေ တွေ့ရတယ်။ ရှေးခတ်ဂရိနိုင်ငံ အိုလံပစ်အပြေးပြိုင်ပွဲတွေမှာ သက်လုံကောင်းစေဖို့ ကြက်သွန်ဖြူကို သုံးကြသတဲ့။အနောက်တိုင်းဆေးပညာရဲ့ ဖခင်ကြီးဖြစ်တဲ့ ဟစ်ပိုးခရေးတီးကတော့ စွယ်စုံရကြက်သွန်ဖြူကို ရောဂါတွေ ကာကွယ်ကုသဖို့အတွက် သုံးစွဲခဲ့ဖူးတယ်။

ကြက်သွန်ဖြူကို အနံ့ကြောင့် တချို့က မကြိုက်ကြဘူး။ အနံ့ဆိုးပေမယ့် ကြက်သွန်ဖြူမှာ ကျန်းမာရေးကောင်းကျိုးတွေ များစွာရှိတယ်။လေ့လာတွေ့ရှိချက်တွေအရ ကြက်သွန်ဖြူအစိမ်းစားခြင်းက ကျန်းမာရေးကောင်းကျိုး ရှိတာ ဟုတ်တယ်။ကြက်သွန်ဖြူကို ကြိတ်ခြေတဲ့အခါ အထဲမှာ သိုလှောင်ထားတဲ့ အင်ဇိုင်းဓာတ်တွေ ထွက်လာပါတယ်။ အဆိုပါအင်ဇိုင်းတွေက အရောင်ကျစေပြီး ဆဲလ်မှာပါဝင်တဲ့ sulphurဓာတ်ပေါင်းတွေ ထွက်လာအောင် လှုံ့ဆော်ပေးတယ်။ ထွက်လာလို့ sulphur ဓာတ်ကြောင့် ပါးစပ်နံ့ကို နံစေတယ်။ ကြက်သွန်ဖြူမှာပါတဲ့ allicinဆိုတဲ့ ပူရှိန်းရှိန်း ဓာတ်တမျိုးက ပိုးသေစေတဲ့အပြင် အရောင်ကျစေတဲ့ အစွမ်းလည်း ရှိတယ်။ ပိုကောင်းတဲ့အချက်က ပိုးသတ်ဆေးတွေလို ဆေးယဉ်တာမရှိဘူး။ အချိန်ကြာကြာသုံးနိုင်တယ်။ ဘေးထွက်ဆိုးကျိုးလည်း နည်းတယ်။ ထိခိုက်ဒဏ်ရာရတဲ့အခါ ကြက်သွန်ဖြူကို ကျိတ်ပြီး အုံပေးနိုင်တယ်။

ထပ်တွေ့တာက အူလမ်းကြောင်းမှာရှိတဲ့ Campylobacter ဗက်တီးရီယားရောဂါပိုးအတွက် ကြက်သွန်ဖြူမှာပါတဲ့ Diallyl sulfide ဓာတ်ပေါင်းက သမာရိုးကျပိုးသတ်ဆေးတွေထက် အဆ(၁၀၀)ကျော် အာနိသင်ကောင်းတယ်လို့တွေ့ရတယ်။ အဲဒီဓာတ်ကပဲ နှလုံးအတက်ခ်(heart attack)အတွက် အသုံးဝင်ပါတယ်။ တွေ့ရှိချက်တွေအရ Hydrogen sulphide က နှလုံးပျက်ဆီးမှုကို လျှော့ချပေးနိုင်ပါတယ်။ ဒါပေမယ့် အငွေ့ပြန်လွယ်လို့ သုံးဖို့မလွယ်ကူပါဘူး။ ဒီနေရာမှာ အစားထိုးဖို့ ကြက်သွန်ဖြူရဲ့ Diallyl sulfideကို သုံးစွဲကြည့်တဲ့အခါ နှလုံးပျက်ဆီးမှုကို ၆၁ရာခိုင်နှုန်းထိ ကာကွယ်ပေးပါတး တွေ့ရတယ်။ ဒါတင်မကသေးဘူး။ ကြက်သွန်ဆီက သွေးကြောနံရံတွေရဲ့ ရုန်းဆံ့နိုင်စွမ်းကို အားကောင်းစေတယ်။ သွေးတိုးနဲ့ ကိုလက်စတော ကျဆင်းစေတယ်။ သွေးတွင်းသကြားဓာတ်ကို ထိန်းညှိပေးလို့ ဆီးချိုသမားတွေနဲ့ သင့်တော်ပြန်တယ်။ ဆီးချိုရောဂါသည်တွေ ခံစားရတဲ့ နှလုံးကြွက်သားပျက်ဆီးမှုကိုလည်း ကာကွယ်ပေးတယ်။သိပ်မကြာခင်က နော်ဝေးမှာရှ်ိတဲ့ ကိုယ်ဝန်ဆောင်အမျိုးသမီး နှစ်သောင်းနီးပါးကို လေ့လာကြည့်တဲ့အခါ နေ့လ မစေ့မှီ ကလေးမီးဖွားခြင်းနဲ့ ပေါင်မပြည့်ခြင်းကို လျှော့နည်းစေတာ တွေ့ရတယ်။

နောက်ပိုင်းတွေ့ရှိချက်တွေအရ ကင်ဆာရောဂါဖြစ်ပွားမှုကိုပါ ကျဆင်းစေတယ်လို့ ဆိုလာတယ်။ အစာအိမ်ကင်ဆာ၊အူမကြီးကင်ဆာ၊အဆုတ်ကင်ဆာ၊ရင်သားကင်ဆာတွေကို ကာကွယ်နိုင်ဖို့ ကြက်သွန်ဖြူရဲ့အာနိသင်ကို လေ့လာကြည့်တော့ အကောင်းဖက်က်ို ဦးတည်နေတယ်။ကြက်သွန်ဖြူကို တပတ်မှာ နှစ်ကြိမ် စားပေးရုံနဲ့ အဆုတ်ကင်ဆာဖြစ်ပွားမှုကို ၄၄ရာခိုင်နှုန်းထိ လျှော့နည်းစေသတဲ့။ တွေ့ရှိချက်က အဆုတ်ကင်ဆာ မျိုးရိုးရှိသူတွေအတွက် ဝမ်းသာစရာတွေ့ရှိချက်ပါ။ လေထုညစ်ညမ်းတဲ့နေရာ၊ စက်ရုံအလုပ်ရုံတွေမှာ အလုပ်လုပ်သူတွေအနေနဲ့ ကြက်သွန်ဖြူပိုစားပေးသင့်တဲ့ သဘောဖြစ်တယ်။ ဆေးလိပ်သောက်သူတွေလည်း အလားတူစားပေးသင့်တယ်။ ဒါ့ပြင် ဦးနှောက်အကျိတ်တွေမှာ ကြက်သွန်ဖြူမှာပါတဲ့ ဆာလ်ဖာဓာတ်က ဦးနှောက်ကင်ဆာဆဲလ်တွေကို ထိန်းချုပ်နိုင်တဲ့အာနိသင်ရှိတာ တွေ့ရတယ်။

ကျန်းမာရေးအတွက် ကောင်းကျိုးရှိတယ်လို့ယူဆသူတွေက အနံ့ဆိုးတဲ့ကြက်သွန်ကို နည်းအမျိုးမျိုးနဲ့ ခန္ဓာကိုယ်ထဲရောက်အောင် လုပ်ကြတယ်။ တချို့က ပျားရည်နဲ့စိမ်ပြီး နှပ်သောက်ကြတယ်။ သံပုရာရည်ထဲ ထည့်သောက်သူလည်း ရှိသေးတယ်။ တခါကျတော့ နှလုံးရောဂါနဲ့ ဆေးခန်းလာပြတဲ့ လူနာအမျိုးသမီးတယောက် သူဟင်းချက်တိုင်း ကြက်သွန်ဖြူ လေး၊ငါးလုံးလောက်ကို အမြဲထည့်ချက်စားပါသတဲ့။ ဒီလိုစားလို့ သူအခုအခုတော်တော် အဆင်ပြေနေပြီလို့ ဆိုပါတယ်။ သီအိုရီအရ သူ့ရဲ့အယူအဆက မမှန်ပါ။ ဘာ့ကြောင့်လဲဆိုတော့ ဟင်းတွေမှာ ထည့်ချက်တဲ့ကြက်သွန်ဖြူဟာ အရသာအတွက်သာဖြစ်ပါတယ်။ ကျန်းမာရေးကောင်းစေဖို့ မဟုတ်ပါ။ ကြက်သွန်ဖြူကို အပူနည်နည်းပေးရုံနဲ့ အစွမ်းသတ္တိတွေ သိသိသာသာ လျှော့နည်းသွားတယ်။ ကျန်းမာရေးအတွက် ကြက်သွန်ဖြူ စားမယ်ဆိုရင် အစိမ်းလိုက် စားမှသာ အာနိသင်ရှိမှာဖြစ်ပါတယ်။ ဒါက မှားယွင်းနေတဲ့ အယူအဆအချို့က်ို ထောက်ပြတာပါ။

ကျန်းမာရေးနဲ့မဆိုင်တဲ့ ရိုးရာယုံကြည်မှု၊ဒဏ္ဍာရီတွေလည်း ရှိသေးတယ်။အနောက်နိုင်ငံတွေမှာ ကြက်သွန်ဖြူက မကောင်းဆိုးဝါး နှိင်နင်းနိုင်တယ်လို့ ယုံကြည်ကြတယ်။ စုန်း၊ကဝေ၊သရဲ၊သွေးစုပ်ဖုတ်ကောင်ရန် ကာကွယ်ဖို့ ကြက်သွန်ဖြူကိုကြိတ်ပြီး သုတ်လိမ်းတာ၊ချိတ်ဆွဲတာ မျိုးတွေ အနောက်တိုင်းရုပ်ရှင်ဇာတ်ကားတွေထဲမှာ မကြာခဏ တွေ့ဖူးလိမ့်မယ်။ ယုံတမ်းပုံပြင်၊ဒဏ္ဍာရီတွေ အမျိုးမျိုးကွဲပြားနိုင်ပေမယ့် လူတွေကို သွေးမစုပ်နိုင်အောင် ကာကွယ်နိုင်တာတော့ ဟုတ်ဟန်တူတယ်။ ဘာ့ကြောင့်လဲဆိုတော့ ကြက်သွန်ဖြူရဲ့ အနံ့က ခြင်မလာနိုင်အောင် ကာကွယ်ပေးတဲ့ mosquito repellent ဓာတ်သဘောရှိလို့ ဖြစ်ပါတယ်။

ဒေါက်တာအေးမင်းထူး

Post Author: Ma Ma Lay